O día 24 de xuño o pobo de Baños de Molgas organizou unha misa-cea en homenaxe a Dona Carmucha (Carmen Rodríguez Dacosta), directora do CEIP deste concello, centro no que desenvolveu a súa actividade docente nos últimos 25 anos.
				A misa tivo lugar no Santuario dos Milagres sendo celebrada polo sacerdote Mercedario “Paco” coa compañía no altar dos profesores (algún deles un tanto nervioso). A cea foi no restaurante "Los Milagros" que está a carón do Santuario e rexentado por "Paco".
		O pobo, coa súa presencia, quixo agradecer así a dedicación e entrega que "Carmucha" tivera con eles ou cos seus familiares (fillos, netos, ...).
		Foi un día moi especial para a  directora xa que estivo arroupada polos seus alumnos, ex-alumnos, profesores, ex-profesores, veciños, corporación municipal e sobre todo pola súa nai. O motivo de ledicia foi dobre, porque non se da con moita frecuencia que un pobo mostre o seu agradecemento a un mestre.
				Nesta nova etapa que lle toca vivir, toda a comunidade educativa do colexio desexa que a disfrute o mellor posible en compañía dos seus, pero tamén que non se esqueza de nós e veña a visitarnos de vez en cando.