Para comezar o noso traballo realizamos unha enquisa na que os nenos e as nenas elixiron os seus intereses.

Na enquisa tamén se preguntaba sobre o estilo de traballo, as aptitudes...

Grazas a todo este traballo previo puidemos determinar que tema era o preferido do alumnado, e en que tipo de tarefas se podía desenvolver mellor para participar no proxecto.

Unha vez que puidemos determinar o proxecto comezamos a nosa actividade.

O primeiro que fixemos foron actividades de motivación, e para iso contactamos cun astrónomo local que acudiu ao centro e nos deu unha charla sobre astronomía.

Aprendimos moitas cousas, e sobre todo abriunos o apetito de descubrir novas cousas sobre o Universo, o noso sistema Solar e os astrónomos que investigaron no pasado sobre a estrutura do espazo.

A partires da conferencia do astrónomo comezamos a traballar nunha maqueta do noso Sistema Solar.

Houbo que facer os planetas a escala, pintalos coas súas cores predominantes.

A verdade que nos quedou moi chulo, non si?

Seguimos tentando buscar xente que nos puidese orientar no noso traballo, así que contactamos coa ESA, e ao través dela con Pedro Duque.

Remitíronos unha conferencia de Pedro Duque e unha carta do mesmo na que nos aconsellaba estudar moito e manter unha boa forma física.

E con estes ánimos do noso astronauta xa nos sentimos con azos para comezar a traballar duro procurando información sobre o Universo.

Os Lapbooks son os libros nos que imos recollendo os resultados das nosas investigacións.

Cando, tras investigar, elaboramos un tiñámolo que expoñer diante da clase.... que nervos!.

Aprendimos a citar os recursos, tanto libros como webs, que empregamos para tirar a información deles.

A parte das investigacións que fomos realizando na biblioteca, na casa, en informática... na clase traballamos moito sobre o tema.

Fixemos fichas, e en todas as materias se trataba o tema do Universo.

Matemáticas, inglés, galego, castelán, plástica... todo vale para aprender máis cousas do ceo.

Ocorréusenos que como se vería o noso colexio dende o espazo se embarcásemos nun foguete espacial.

Así que montamos un globo sonda con Helio, e colgámoslle un teléfono móbil cun programa de timelapse, que saca fotos cada certo tempo.

Soltámolo o Día da Paz, e a gravación colgámola na Web do colexio.

Dende logo, subir a un foguete ten que marear a un.

No Entroido fixemos un folión galáctico.

Como podedes ver nas fotos a Forza acompañounos todo o tempo, e a pesares de que houbo membros do lado escuro, o folión soou de marabilla.

Para entender por que a Lúa ten a súa forma cambiante, fixemos en clase de plástica un modelo da súa evolución ao longo do mes luar.

Dende logo nunca máis nos terán que explicar como funciona, quedounos moi ben aprendido.

Animádevos a facer un modelo destes, é doado e así tamén o comprenderedes coma nós.

No Barco, no paseo do Malecón temos un reloxo solar, que se fixo para lembrar o centenario da observación do eclipse solar de 1905 ao que acudiu o astrónomo Comas Solá.

Aprendimos como nos temos que colocar para saber a hora... coidado a hora solar, non a oficial.

Así que xa sabedes, se esquecestes o reloxo e queredes saber a hora, pasade polo Malecón... se é de día e hai sol, claro!.

Tanto investigar e aprender sobre o Universo levounos a querer explicar as nosas investigacións a todo o mundo.

Puxémonos en contacto co xornal dixital Somos Comarca e fixéronos unha reportaxe do noso traballo.

Aí anunciamos que iamos facer unha exposición na Casa da Cultura para que todos puidesen aprender de nós algo do noso Universo.

Puxémonos a preparar a nosa exposición, e deseñamos un planetario.

Fixémolo como o da clase, pero para ser instalado no noso libro panel do Universo.

Non sabedes nada do libro panel... non vos preocupedes, un pouco máis abaixo falamos del.

Para presentar os nosos traballos elaboramos un libro-panel, ao que engadimos o noso planetario.

A estrutura fíxoa un carpinteiro, pero nós pintamos, fixemos a montaxe eléctrica, o deseño das constelacións....

A que quedou moi chulo?

Dende a Biblioteca nos animaron a facer un xogo cos Escornabots, e puxémonos mans á obra.

Deseñamos un patrón para que se movese o noso robot, elaboramos as preguntas...

Foi un éxito rotundo!

Tamén se nos ocorreu que podiamos agasallar aos visitantes con algo de comer... tanto aprender dá fame!

Así que aprendemos a facer galletas, e démoslle a forma dos nosos planetas.

A verdade é que quedaron moi saborosas!

Unha vez que tiñamos todo listo fomos ao resto dos colexios do noso Concello e invitámolos a que acudiran á exposición que artellamos na Casa da Cultura.

Establecemos quendas para atender os distintos postos e explicar aos visitantes as partes de que constaba a nosa exposición

Tamén había encargados de atender aos xogos interactivos: o pasapalabra, o escornabot e para ofrecer as nosas deliciosas galletas

Embarcámonos cos nosos pais cara a Santiago, á Cidade da Cultura, para presentar o noso proxecto na Feira de Piteas

Nos acompañaban os nosos compañeiros do colexio, cada clase co seu proxecto: Os investigalumes de segundo, os de Pelo, Pico, Escama de 4º e 5º...

Outros proxectos quedaron no colexio, os dous proxectos de infantil, as mascotas de primeiro e os animais mitolóxicos de 3ºA... pero é que non había sitio para todos nos autobuses!

Fomos tantos os proxectos que traballamos neste ano, que queriamos ver o traballo dos nosos compañeiros, así que montamos tamén unha feira de proxectos no colexio

Aquí si que participamos todos e todas, e foi chulísimo!

Ao remate de todo o proceso aínda tiñamos unha sorpresa.

Coa impresora 3D da Biblioteca imprimimos uns chaveiros de recordo deste proxecto

Cada vez que teñamos que coller as chaves lembraremos o Universo!