De
todos é sabido o importante que é, na sociedade actual, o coñecemento de
varias linguas estranxeiras, en especial da lingua inglesa. Tamén sabemos que
o mellor é iniciar canto antes aos alumnos/as no coñecemento dun idioma
estranxeiro xa que, segundo as actuais teorías lingüísticas a adquisición
doutra lingua sigue procesos similares ao da adquisición da lingua materna.
Na
nosa escola dispoñemos dunha aula específica para a ensinanza do inglés.
Nela o alumnado ten á súa disposición diverso material que utiliza segundo
as diferentes actividades que se desenvolvan.
A
aula distribúese en distintos lugares de traballo. Ademais da zona
convencional de mesas e cadeiras, temos un recuncho onde se expoñen os
traballos dos nenos e nenas, outro onde realizan manualidades, un espazo
adicado ao coñecemento dos aspectos culturais de Gran Bretaña (con mapas,
fotos, libros, postais, etc).
As
tarxetas de vocabulario (flashcards), pósters, carteis (wall charts) están
expostas na aula de forma fixa para facilitar a adquisición de vocabulario,
reforzar as estructuras básicas do idioma e memorizar as expresións máis
usuais.
Dispoñemos
tamén de material audiovisual como son os casetes incluíndo cantigas,
ritmos, poesías e vocabulario propio de cada unidade, e cintas de video que
facilitan o coñecemento da cultura anglosaxona; ademais coa audición e
repetición do vocabulario o alumnado mellora a pronuncia e a comprensión
auditiva da lingua e potencia a súa expresión oral.
Un
dos obxectivos principais que pretendemos na aula de inglés é que os
alumnos/as poidan desenvolver a capacidade de comunicarse nesa lingua, tomando
como base os seus coñecementos previos e ampliándoos.
Intentamos
fomentar, ao mesmo tempo, o interese pola aprendizaxe do inglés e facer deste
unha experiencia positiva.
Outro
dos obxectivos que buscamos é facer que tomen conciencia de certos aspectos
culturais e cotiás de Gran Bretaña, así coma doutras áreas da cultura
xeral.
Á
aula de inglés acuden todos os nenos e nenas da escola, dende Educación
Infantil ata sexto de Primaria. Tendo en conta isto, o ritmo de traballo e o
tipo de actividades que se realizan son moi diferentes, dependendo da idade e
das necesidades de cada grupo e de cada alumno/a, intentando crear sempre un
ambiente agradable e desinhibido.
CEIP DE
CEDEIRA
