Contidos:

Becas para estudios non universitarios

BOLSAS QUE PODEN SOLICITAR OS ESTUDIANTES GALEGOS NO ENSINO OBRIGATORIO E ESTUDIOS MEDIOS

Bolsas convocadas polo MEC
Infórmase sobre as bolsas que se outorgan na C.A. de Galicia no ensino non universitario, sendo convocadas e adxudicadas polo Estado, reducíndose a competencia da comunidade autónoma nesta materia a un labor de colaboración na recepción e tramitación das solicitudes que se presentan. Existen bolsas de:   

  • Libros 
  • Educación Especial
  • Convocatoria Xeral
  • Educación Infantil 
    Convocatoria libros

Última convocatoria, (Orde do 25 de abril, BOE nº 105 do 3 de maio de 2006)

Prazo ata 31 de maio de 2006, agás que non teñen reserva de praza nesa data (31 de maio), que poderán presentar esta solicitude con posterioridade.

Axuda de caracter especial para alumnos matriculados en centros sostidos con fondos públicos, en niveis de primeiro e terceiro curso de Educación Secundaria Obrigatoria para compensa-las condicións socioeconómicas desfavorables dos alumnos.

No curso 2006-2007, están convocadas 448.583 bolsas a nivel nacional con un importe de 90,00 € bolsa.

Nesta convocatoria non se ten en conta o rendemento académico, sendo polo tanto o factor económico a condición fundamental. Nas bases da convocatoria especifícase claramente os niveis de renda non superables segundo o número de membros da unidade familiar. É o MEC quen verifica este dato xa que recibidas as solicitudes crúzaas coa AEAT (Axencia Estatal de Administración Tributaria).  No caso de falta de datos na AEAT o MEC solicita esa información a través das Delegacións para o seu trámite posterior como fase R. 

Temos que distinguir unicamente nestas bolsas renovación e nova adxudicación, tendo preferencia a renovación.

O MEC ponse en contacto directamente cos alumnos, envíalles a credencial de bolseiros e lles indica cándo se fará efectivo o importe na súa conta. Cando a bolsa é denegada por fora de cupo o MEC non o comunica.

O impreso sae publicado no BOE (fotocopia), ou a través da páxina web do MEC: http://wwwn.mec.es/mecd/becas/index.html

Convocatoria de educación especial

Son axudas de caracter especial destinadas a colectivos sociais especialmente necesitados de protección. A actual convocatoria saíu publicada mediante Orde do 8 de maio, no BOE nº 123 do 24 de maio do 2006.

Fin do prazo de solicitudes: 23 de xuño de 2006 incluído. Admitiranse solicitudes fóra de prazo cando non admitan demora dada a súa natureza e sempre que se acredite documentalmente a aparición da necesidade con posterioridade ao mencionado prazo. 

Existen tres tipos de axudas individualizadas: 

  • Axudas directas para centros non gratuitos. Constan dos seguintes conceptos: ensinanza, transporte escolar, comedor escolar, transporte de fin de semana, residencia escolar, (compatible con transporte para traslado de fin de semana), transporte urbano, (mínimo 2 Km dentro do casco urbano) material didáctico, (esta  axuda é a básica) e reeducación pedagóxica e da linguaxe. 

  • Subsidios de Educación Especial para transporte escolar ou urbano e comedor para familias numerosas con fillos con discapacidade. 
    Tanto as axudas como os subsidios teñen como requisito fundamental a acreditación da minusvalía.

  • Axudas para actividades complementarias á educación regrada, á sobredotación intelectual. Neste caso deberá acreditarse a sobredotación intelectual informe do equipo de orientación do centro escolar e certificación acreditativa do custo do servizo expedido polo centro.

Neste tipo de bolsas existe renovación e nova adxudicación, tendo preferencia a renovación.

Renovación: se tivo bolsa o curso anterior e non cambia de ciclo, (neste caso non se  observa a renda)   

Nova adxudicación: cambio de ciclo ou se o curso anterior non tivo bolsa.

O MEC confecciona os impresos e son distribuídos gratuitamente a tódalas delegacións que logo se encargarán de repartir ós centros correspondentes. Tamén se poden conseguir a traves da páxina web do MEC: http://wwwn.mec.es/mecd/becas/index.html 

O MEC ponse en contacto directamente co alumno, envíalle a credencial de bolseiro e  indícalle cándo se fará efectivo o importe na súa conta. 

Convocatoria xeral.

A actual convocatoria; BOE nº 156 do 1 de xullo de 2006. Orde do 16 de xuño de 2006.  Son axudas ó estudio para compensa-las condicións socioeconómicas desfavorables dos alumnos, e son outorgadas en función da capacidade económica e do rendemento escolar.  Son axudas de caracter xeral destinadas a alumnos de ensinanzas medias e universitarios que cursan estudios na nosa comunidade autónoma.

Ten 6 compoñentes:

  • Axuda compensatoria, (que terá que cumprir 3 requisitos: 1º ser maior de 16 anos, 2º ser colectivo preferente, e 3º estar dentro do límite de renda mínima que marca o MEC);

  • de transporte, (mínimo 5 Km aumentando a axuda segundo a distancia);

  • de residencia, (non é compatible coa axuda de desprazamento);

  • para material escolar, (axuda básica desta convocatoria);

  • axuda para gastos derivados de matrícula, de estudios universitarios en centros públicos e privados e resto de alumnos que cursen estudios en centros estatais;

  • axudas para gastos determinados pola condición xurídica do centro docente e do seu réxime financeiro, no nivel de ensinanzas medias, (concédese esta axuda a alumnos que cursan os seus estudios en centros privados e concertados). 

Nesta convocatoria tense en conta o rendemento académico e a parte económica. Nas bases da convocatoria puntualízanse ós niveis de renda non superables segundo o número de membros da unidade familiar. O MEC cruza os datos coa AEAT polo que vai a ser Economía quen dea esta información.
O MEC ponse en contacto directamente con cada alumno, envíalle a credencial de bolseiro así como cando se fará efectivo o importe na súa conta.   

O impreso adquírese no estanco ou a traves da páxina web do MEC: http://wwwn.mec.es/mecd/becas/index.html Fin do prazo para a presentación de instancias: 31 de outubro de 2006.    

As Delegacións Provinciais proceden á denegación de aquelas bolsas que non cumpran os datos académicos esixidos na convocatoria.  

Convocatoria de educación infantil.

(Actual convocatoria, BOE nº 197 do 18 de agosto de 2006. Orde do 13 de xullo de 2006.) 

Abarca nenos de 3, 4 e 5 anos matriculados no 2º ciclo de Ed. Infantil en centros non sostidos con fondos públicos sendo o seu importe de 596,00 €. Nesta convocatoria non se ten en conta o rendemento académico.

Neste tipo de bolsas existe renovación e nova adxudicación tendo preferencia as renovacións. As novas adxudicacións fanse en orden inverso a magnitude da renda, sendo, o cruza-los datos, a AEAT quen verificará os mesmos.

Fin do prazo de presentación de instancias: 31 de outubro de 2006.

O MEC ponse en contacto directamente con cada alumnos, envíalle a credencial de bolseiro así como cando se fará efectivo o importe na súa conta. 

O impreso adquírese no estanco (é o mesmo da convocatoria xeral) ou na páxina web  do MEC: http://wwwn.mec.es/mecd/becas/index.html

Bolsas convocadas pola Comunidade Autónoma de Galicia

Programa de gratuidade de libros de texto en centros sostidos con fondos públicos para os niveis obrigatorios e gratuítos convocados pola comunidade autónoma de Galicia.

  • Curso 2003/2004 para o 6º curso de Educación Primaria.

  • Curso 2004/2005 para o 2º curso de Educación Secundaria Obrigatoria.

  • Curso 2005/2006 para 3º e 4º curso de Educación Primaria.  Amplíase en setembro aos cursos 1º, 2º e 5º de Educación Primaria, completándose así a gratuidade dos libros na educación primaria.

  • Curso 2006/2007 para 4º curso da ESO.  

Orde do 23 de maio de 2006, data da publicación 31 de maio, (DOG nº 103).

Fin da convocatoria: 30 de setembro de 2006.   

No curso 2006/2007 implántase o programa da gratuidade en 4º curso da ESO, e procédese a reposicións dos libros de texto de todos os cursos de Educación Primaria e de 2º da ESO. Ademais poderán repoñer os libros das áreas impartidas en galego de 5º de Educación Primaria.

A elección dos libros de texto do programa da gratuidade terán unha vixencia de catro cursos e a súa aprobación efectuarase de acordo coa normativa vixente. Os novos alumnos que se incorporen ao curso poderán acollerse ao programa en calquera dos cursos obxecto da gratuidade.

Os alumnos con necesidades educativas específicas poderán incluírse no programa da gratuidade aínda que os libros que utilicen estes alumnos non correspondan cos aprobados polo órgano competente no centro para o citado nivel educativo.  

Esta axuda é incompatible con calquera outra para o mesmo fin.

Para máis información mirar a páxina Web do MEC, http://wwwn.mec.es/mecd/becas/index.html ou chamar ós seguintes teléfonos:  

A Coruña: 981.184741
Lugo: 982.294188/89
Ourense: 988.386651 
Pontevedra: 986.805951  
Santiago: 981.544431