Cando se trata de ordes veterinarias para a elaboración dunha fórmula maxistral ou dun preparado ou fórmula oficinal, faise nunha receita oficial normalizada na que, ademais da información indicada nos puntos anteriores, debe figurar:

• A composición cuantitativa e cualitativa.

• O proceso morboso (enfermidade) que se pretende tratar e a especie animal á que se destina.

• A cantidade a elaborar.

Se o que se prescribe é un penso medicamentoso existe outro tipo de receita específica na que basicamente se inclúen os mesmos datos que nunha receita para medicamentos, pero ademais inclúense outros datos relativos ao penso:

• Afección que se vai a tratar.

• Prazo de conservación do penso.

• Cantidade de penso a preparar (en Kg.).

• Nome ou razón social do proveedor do penso medicamentoso.

• Recomendacións e proporción do penso na ración diaria, frecuencia e duración do tratamento.

• As lendas "Caduca aos 10 días" e "Válido para un so tratamento".

Anverso do orixinal, primeira e segunda copia da receita para penso medicamentoso

Tamén o reverso da receita para pensos é distinto, coa salvedade de que o orixinal (para o fabricante ou distribuidor) non ten nada no reverso posto que un penso medicamentoso non pode ser substituído.

• O reverso da primeira copia inclúe a dilixencia por venda do animal, coa sinatura do vendedor e o comprador.

• O reverso da segunda copia (para o veterinario/a), inclúe as instrucións de uso.

NOTA: Aínda que nas imaxes da receita para pensos medicamentosos pon unha validez de trinta días, unha corrección de erros establece que a súa validez é de dez días. A mesma corrección de erros indica que no reverso da segunda copia debe poñer a lenda "A medicación prescrita non superará o tratamento de máis dun mes"  .

Dispensación: Os medicamentos veterinarios só poden dispensarse en:

• Oficinas de farmacia legalmente autorizadas.

• Entidades ou agrupacións gandeiras legalmente autorizadas.

• Establecementos comerciais detallistas legalmente autorizados.

No caso de fórmulas maxistrais ou preparados ou fórmulas oficinais só as oficinas de farmacia están autorizadas para a súa elaboración e sempre que estea indicada claramente o destino das mesmas (explotación gandeira ou animais concretos).

1.- Oficinas de farmacia: Respecto á dispensación de medicamentos veterinarios, fórmulas maxistrais e preparados ou fórmulas oficinais, teñen as seguintes obrigas:

• Dar cumprimento a canto fai referencia á dispensación das mesmas como centros exclusivos autorizados para a súa elaboración.

• Reseñar no Libro de Rexistro de Tratamentos Veterinarios os medicamentos de uso humano, cando sexan obxecto dunha prescrición veterinaria.

2.- Entidades ou agrupacións gandeiras: Deben cumprir os seguintes requisitos:

• Dispor de locais acondicionados de xeito que non afecten negativamente á almacenaxe dos produtos e dotados de medios refrixeradores axeitados, con dispositivos de control que garanten o funcionamento dos mesmos.

• Levar a cabo un programa zoosanitario que, incluíndo o estricto cumprimento das normas sobre sanidade animal que lle sexan de aplicación e o cumprimento dos tempos de espera, sexa aprobado pola correspondente Comunidade Autónoma.

• Contar con Servizos Farmacéuticos e Veterinarios responsables do cumprimento das obrigas que lle encomenda a lei:

  • Dos técnicos farmacéuticos:

    • Garantir o cumprimento das disposicións de orde sanitaria sobre dispensación de medicamentos veterinarios.

    • Coidar que a almacenaxe dos medicamentos se efectúa nas debidas condicións e garantizar a súa lexitimidade de orixe.
      Verificar as condicións sanitarias de transporte, de entrada e saída de medicamentos.

    • Supervisar o cumprimento da lexislación especial sobre estupefacientes e psicótropos e esixir a adopción das medidas axeitadas sobre o seu control.

    • Colaborar nos programas zoosanitarios que requiran dos seus servicios profesionais.

  • Dos técnicos veterinarios:

    • Garantir o cumprimento dos programas zoosanitarios.

    • Prescrición dos medicamentos.

    • Supervisión dos tratamentos e a responsabilidade do cumprimento dos tempos de espera.

• Subministrar medicamentos veterinarios exclusivamente aos seus membros.

• Estar identificados coa lenda "Produtos zoosanitarios".

• Non almacenar máis ca medicamentos veterinarios e outros productos sanitarios de uso veterinario autorizados e aditivos de alimentación animal que figuran nas listas positivas oficiais, sempre nos envases orixinais intactos e, no caso de aditivos, axeitadamente identificados.

• Garantir a observancia das condicións xerais ou particulares de conservación dos medicamentos e especialmente o mantemento da cadea de frío en toda a rede de distribución.

• Dispensar medicamentos veterinarios sometidos a prescrición veterinaria só contra a presentación da correspondente receita.

• Conservar a documentación detallada que deberá conter como mínimo os seguintes datos para cada transacción de entrada ou saída:

  • Data.

  • Identificación precisa do medicamento veterinario.

  • Número de lote de fabricación.

  • Cantidade recibida ou subministrada.

  • Nome e dirección do proveedor ou do destinatario.

  • Cando se trata de produtos sometidos a prescrición, nome e dirección do veterinario que recetou o medicamento e referencia á receita arquivada.

• Levar a cabo, canda menos unha vez ao ano, unha inspección detallada na que se contrasta a lista de produtos entrantes e saíntes coas existencias nese momento, elaborando un informe en caso de irregularidades.

• A presencia e actuación profesional do farmacéutico responsable do servizo ou servizos farmacéuticos debe garantir o cumprimento das funcións encomendadas.

3.- Establecementos comerciais detallistas: Deben cumprir os seguintes requisitos:

• Dispor de locais acondicionados de xeito que non afecten negativamente á almacenaxe dos produtos e dotados de medios refrixeradores axeitados, con dispositivos de control que garanten o funcionamento dos mesmos.

• Contar cun servizo farmacéutico.

No que fai referencia ao subministro de premezclas medicamentosas, pode efectuarse directamente ou a través dos canais comerciais autorizados para a distribución ou dispensación de medicamentos veterinarios de prescrición e só con destino ás industrias elaboradoras de pensos medicamentosos e, no seu caso, ás explotacións gandeiras expresamente autorizadas. En calquera caso deben someterse aos requisitos de almacenaxe, conservación e control documental que se esixen aos demais medicamentos veterinarios.

Produtos de distribución e venda por outros canais: Os medicamentos destinados aos animais de compaña, de terrario, paxaros domiciliarios, peixes de acuario e pequenos roedores que non esixan prescrición veterinaria poden distribuírse e venderse en establecementos distintos aos previstos máis arriba sempre que cumpran coas condicións de almacenaxe, conservación e control documental para medicamentos sen receita.

Botiquíns de urxencia: Cando por razóns de distancia e urxencia e se nun municipio non existe oficina de farmacia nin un centro de subministro de medicamentos veterinarios autorizado pódese establecer un botiquín de urxencia que só pode conter aqueles medicamentos que fixe a Administración e no que non poden incluírse estupefacientes nin psicótropos.