O noso centro inaugurouse no curso 1998-99 e dende entón ata o ano 2002 coñecíase polo nome do concello no que se sitúa, Vila de Cruces. A partir deste ano conta co nome oficial de IES "Marco do Camballón". De seguido expoñemos unha breve información sobre o significado do seu nome.
"Marco do Camballón" é a denominación dunha necrópole megalítica situada na parroquia crucense de Oirós, delimitada por Besexos e Sabrexo polo norte, Asorei e Losón polo sur, Besexos e Galegos polo leste e Bodaño e Sabrexo polo oeste. Este campo de mámoas esténdese á esquerda da estrada Lalín - Vila de Cruces, cerca de Agoleta, e xa aparece catalogado no Inventario de monumentos megalíticos de Filgueira Valverde editado no ano 1977, no que se cita como fonte bibliográfica a López Cuevillas.
No ano 1975 Xosé Carlos Sierra, á fronte dun equipo do Departamento de Arqueoloxía da Universidade de Santiago, realizou excavacións nesta necrópole, que consta polo menos de quince túmulos. O máis interesante é o catalogado co número 5, que contén un dolmen de cámara poligonal, con tendencia circular, formada por sete ortostatos. Como é sabido, os monumentos megalíticos galegos son de tres tipos: dolmens, pedrafitas e círculos líticos; os primeiros son os máis numerosos e importantes e presentan carácter funerario, posto que neles se facían enterramentos colectivos, aínda que a acidez do solo galego impediu que se conservasen restos óseos; ademais disto, son elementos delimitadores do territorio que singularizan a comunidade que os levantou, por iso con frecuencia se sitúan en lugares elevados ou cerca de correntes de auga.
Dentro da tipoloxía dos dolmens (dolmens simples, dolmens de corredor e cistas megalíticas) o Marco do Camballón correspóndese cos primeiros, dolmens simples, que xorden arredor do ano 4000 a. C e constitúen, polo tanto, exemplos do primeiro megalitismo galego. Nun dos ortostatos apareceron diversos gravados serpentiformes e un motivo solar, ademais de restos cerámicos lisos e campaniformes e un disco perforado. Tamén se localizaron pequenas pezas de ouro, de feito hai quen relaciona o nome da parroquia, Oirós, con este preciado metal.
Podedes atopar información e fotos desta necrópole en:

	· Filgueira Valverde, José: Inventario de monumentos megalíticos. Catalogación arqueológica y artística patrocinada por la Fundación "Pedro Barrié de la Maza, Conde de Fenosa", 1977.
	Varios Autores: Gran Enciclopedia Gallega, 1974
	Varios Autores: Galicia. Arte prehistórica e romana (tomo IX), Hércules de Ediciones.
	Vázquez Crespo, A. e González Alén, D.: A comarca do Deza, Deputación de Pontevedra, 1989.
	http: //www.pangalaica.com/megalitismo/galego