|
Unha
familia esquimó é moi pobre e non ten iglú.
No polo norte, onde viven, xeo hai dabondo, pero non poden
usalo porque todo el pertence a unha empresa privada dos Estados
Unidos. Os fillos teñen unha idea: a sarabia cae do
ceo, polo tanto non ten dono. Así, traballando arreo,
conseguen xuntar o pedrazo suficiente para construír
un bonito iglú ao que chaman Blum.
A mágoa é que o Blum sae moi caprichoso e sempre
está pedindo cousas. A familia esquimó fai o
que pode para telo contento, pero Blum nunca queda satisfeito.
Finalmente, Blum di que non atura máis vivir alí
porque vai moito frío, así que quere marchar
e ver mundo.
|
|
A
familia esquimó non sabía que facer para que
Blum viaxase. Un día pasou por alí o Gran Circo
de Frigolandia e cambioulles o iglú por unha tenda
de lona de cor vermella e verde, unha radiocasete, canas de
pescar, anzois, abrigos e unhas entradas gratis para o circo.
Os do circo cortan a Blum en varios anacos e póñeno
a traballar: arrefría os refrescos na neveira e mais
o peixe no frigorífico, usan os anacos de xeo para
aliviar os croques dos pallasos e tamén para que os
pallasos fagan rir a xente botándose uns aos outros
cubos de xeo polas costas.
Un día cando Blum estaba arrefriando os refrescos na
neveira, atopouse con Blam, outro cubo de xeo que antes tamén
fora iglú, pero femia, non macho coma Blum. Empezaron
a falar e a preguntarse cousas o un á outra. Ao cabo
dun tempo, Blum decatouse de que se estaba namorando de Blam.
A xente do circo tamén se decatou de que algo acontecía
porque a neveira en vez de arrefriar comezou a quentar. Claro,
era a acendida paixón de Blum por Blam. Por sorte,
Blam tamén se decatou do que Blum sentía por
ela e púxose feliz porque o sentimento era mutuo. Blam
decide declarárselle a Blum e así foi como fixeron
parella. Menos mal que todo saíu ben porque se non
Blum teríase derretido por mor dun amor non correspondido.
Decidiron entón casar e ter fillos, aos que chamarían
Blusiti e Blamxabi. E así, Blum aprendeu a non ser
caprichoso.
Cando Blum e Blam casaron, invitaron á voda a familia
esquimó, que montara unha tenda de peixe fresco e vivía
quentiña e feliz. Máis tarde, cando naceron
Blusiti e Blamxabi, volveron visitalos e leváronlles
agasallos aos bebés-cubiños: un batedor de xeo
para facer picado de limón e unha pista de patinaxe
con espectáculo de focas incorporado.
|
