CAMIÑANDO O PATRIMONIO Tras un ano de elaboración, lenta pero segura, por fin levamos a cabo o proxecto Afranio. Os Institutos de Tomiño e Silleda reandaron sobre as pegadas dos seus devanceiros. A idea xurdiu tras as xornadas organizadas pola asociación cultural Adellís en torno á figura dos silledenses Antón Alonso Ríos e Ramón de Valenzuela. Ambos os dous escritores e políticos estiveron fuxidos ao comezo da guerra civil e relataron as súas vivencias en sendas autobiografías. O Ciclo Medio de Actividades Físico Deportivas puxo sobre a mesa a posibilidade de elaborar unhas rotas seguindo os lugares descritos nas obras, e dito e feito. A primeira camiñada, na que participaron mais de 100 persoas, entre alumnado de 4º da ESO, Ciclo e profesores, celebrouse o 24 de Abril. O percorrido comezou en Tebra (Tomiño) e finalizou en Torroña (Oia), e seguiu os pasos descritos por Antón Alonso Ríos no inicio do seu “O siñor Afranio ou como me rispei das gadoupas da morte” . O día rematou cunha conferencia nas Escolas do Porvenir , impartida polo seu biógrafo, Bieito Alonso, e un amigo persoal que viviu con el no exilio, Mario Rodríguez. Nesta escola de indianos Alonso Ríos exerceu o seu maxisterio antes do golpe de estado, o que dá unha idea do emotivo e do significativo do acto. Galería de fotos da visita a Tomiño O 7 de Maio o alumnado de Tomiño devolveu a visita, xa que percorremos lugares da conca do Deza descritos por Ramón de Valenzuela en “Non agardei por ninguén”. Galería de fotos da rota de Valenzuela   E como sementar en baldío non é produtivo, parte da financiación do proxecto adicouse á edición dun folleto sobre os escritores e as rotas, para que promocións vindeira, destes ou doutros centros, podan repetir a experiencia. Un saúdo desde o bosque e ata pronto…

A ILLA DA MEMORIA

O luns 30 de abril o alumnado de 1º de Bacharelato visitou á Illa de San Simón. Emocionounos lembrar a penurias que alí se pasaron, nunha illa tan fermosa. Pensar que é testemuña dunha parte tan importante da nosa historia! Se as pedras falasen! Ademais, quedamos abraiados porque non contábamos que a illa estivese tan coidade e rehabilitada.

O 2 de maio a illa veu a nós. Para todo o alumnado, pero tamén para todas aquelas persoas que se queiran achegar ao centro, esta exposición que mantén viva na memoria o sufrimento e a miseria das guerras, en particular da nosa guerra civil. As guerras arrancan de nós o peor que agochamos, a ruindade do ser humano. Pero tamén a solidariedade, a nobreza das persoas. As guerras supoñen unha moeda de dúas caras, o anverso e o reverso do ser humano.

...e Antón Caeiro, presentado por Matías Rodríguez da Torre, explicounos dun xeito moi ameno como xurdiu e por que esta exposición, contándonos anécdotas do entrañable que resultou para el coñecer aos protagonistas de moitas das historias dos paneis, así como o labor documental de facer encadrar as pezas, que -ironicamente- neste caso son humanas. Antes de rematar invitou a unha veciña de Silleda, Cachita, a contar en primeira persoa as súas vivencias desta época, posto que ela era filla dun dos presos na Illa. Resultou moi conmovedor.

E todo isto, para sabermos, para resgardar na memoria, que toda guerra é sufrimento, que non hai gañadores nin perdedores, que todo conflito bélico é un fiasco para a humanidade.

Do 12 ao 23 de febreiro poderá visitarse no IES Pintor Colmeiro a exposición "Os mártires do mar" promovida pola Consellería de Cultura da Xunta de Galicia, con motivo do Ano da Memoria. Esta exposición itinerante, que percorreu durante o verán 18 portos do litoral galego a bordo do vapor Hidria II, ofrece información histórica e documentación novidosa sobre a represión fascista exercida contra persoas e colectivos vencellados ao asociacionismo mariñeiro que pretendían mellorar as condicións de vida das xentes do mar.

Aproveitando a presenza desta exposición no noso centro, preparamos unha semana de actividades dirixidas principalmente ao noso alumnado pero abertas tamén ás súas familias e, en xeral, a todas as persoas interesadas .

• O luns 12 de febreiro tivo lugar a proxección do documental Foi no 36 , de Antía Paz, dedicado ao sindicalista moañés José Paz Pena, asasinado en 1936. De seguido, Matías Rodríguez da Torre, coordinador da actividade do Barco da Memoria realizou a presentación da exposición.

LIGAZÓNS DE INTERESE
2006 ANO DA MEMORIA
A EXPOSICIÓN MEMORIAL DA LIBERDADE, EN IMAXES
A ILLA DE SAN SIMÓN
A GUERRA CIVIL VISTA POLOS NENOS
CINE e GUERRA CIVIL