| |
No curso 98-99 levamos a cabo por primeira vez a experiencia de tomar como
eixo globalizador das actividades e bloques temáticos un dos temas transversais.
Deste xeito tivemos a oportunidade de incluir os proxectos desenvolvidos nos
ciclos nun proxecto común integrando actividades variadas e aunando esforzos. O
feito de adicarlle especial atención e traballar só un tema transversal en
cada curso non é impedimento para tratar todos os demais, que constitúen o
soporte conceptual no que se asenta o ensino dos valores, xa que entre todos
eles existe un estreita relación. Así podemos comprobar que o tema transversal
seleccionado para ese curso, a "EDUCACIÓN VIAL" se relaciona con
todos os demais:
- Coa EDUCACIÓN PARA O CONSUMO a través da construcción de figuras
empregando materiais de desfeito, da estructuración do tempo de ocio, da
autorrealización e satisfacción ó comprobar as propias capacidades e
tamén a través da crítica publicitaria.
- En relación á "EDUCACIÓN PARA A PAZ" traballamos o respecto
ás normas de convivencia a través da aprendizaxe das normas de
circulación, a posta en escena de recursos de axuda, resolución de
conflictos e reflexión sobre a agresividade que pode xenerar a situación
de conducir.
- O noso traballo tamén estivo relacionado coa "EDUCACIÓN
AMBIENTAL" toda vez que intentamos estudiar o espacio tanto rural como
urbán dende unha perspectiva humanizadora; concienciar ós nenos e ás
nenas sobre a contaminación química e acústica e implicalos no respecto
polo medio ambiente a través do uso dos transportes colectivos.
- Mediante o estudio das normas de seguridade na circulación e nas viaxes,
encamiñado á prevención de accidentes, traballamos tamén a
"EDUCACIÓN PARA A SAÚDE". Coinciden tamén cos contidos deste
tema o estudio do movemento, a percepción das distancias e o control
postural así como a concienciación sobre o control dos ruídos pola súa
contribución á saúde mental.
- Atendemos á "EDUCACIÓN PARA A IGUALDADE ENTRE OS SEXOS" ó
presentar á muller en situacións iguais ás do home nas actividades
relacionadas coa educación vial (e no resto das situacións cotiás) a vez
que intentamos evitar a existencia de prexuizos e estereotipos, posto que as
normas son iguais para todos sen diferencia de xénero.
|