Na embalaxe exterior deben incluírse todos os seguintes datos:

• Denominación do medicamento seguida da DOE, a DCI ou, no seu defecto, a denominación común ou científica cando o medicamento non teña máis ca un principio activo e a súa denominación sexa un nome de fantasía.

  Cando existan varias formas farmacéuticas e/ou varias dosificacións do mesmo medicamento, debe facerse constar a forma farmacéutica e/ou a dosificación. Se fose preciso indícase tamén se a forma farmacéutica e/ou a dosificación é para lactantes, nenos/as ou adultos/as.

  A denominación pode imprimirse en Braille.

   

  

  Especialidade farmacéutica con impresión Braille

   

• Composición cualitativa e cuantitativa en principios activos por unidade de toma, para un volume ou un peso determinados, empregando as DOE, DCI ou, no seu defecto, a denominación común ou científica.

• Forma farmacéutica e contido en peso, volume ou unidade de toma.

• Relación cuantitativa dos excipientes, indicando os de declaración obrigatoria .

• Forma de administración e, se fose preciso, vía de administración.

• Advertencia: “Mantéñase fóra do alcance dos nenos”.

• Advertencias especiais cando sexa preciso.

• Precaucións particulares de conservación, se fose o caso.

• Precaucións especiais de eliminación dos produtos non utilizados ou dos residuos derivados deses produtos, se fose o caso.

• Nome e dirección do titular da autorización do medicamento.

• Código Nacional do medicamento: O CN é un sistema de identificación rápido, cuio obxecto é axudar e facilitar a xestión das oficinas de farmacia e outros estamentos, facendo posible a adquisición dos medicamentos, efectos e accesorios, produtos de parafarmacia que se atopan no mercado nacional, mediante o tratamento informático dos mesmos.

  Antes de setembro de 2004 o CN estaba formado por seis díxitos, do que o último era un díxito-control, pero o incesante aumento do número de especialidades autorizadas fai que a dispoñibilidade de números se estea a esgotar, de aí que a partir de setembro de 2004 se implante un novo sistema de numeración no CN dos medicamentos. A partir desta data o Código Nacional do medicamento está formado por seis díxitos integrados e, separado dos anteriores por un punto, un díxito-control, que coincide co díxito-control do código de barras presente no cupón-precinto . Esta nova numeración debe estar na esquina superior dereita da cara principal da embalaxe.

  Como o sistema está en implantación, coexistirán ambos os dous sistemas de identificación do CN ata setembro de 2009, data na que os laboratorios deberán ter identificadas todas as especialidades farmacéuticas coa nova numeración do código nacional .

   

Código Nacional vello do Mucosan xarope

Código Nacional novo do Mucosan xarope

• Identificación do lote de fabricación e data de caducidade (mes e ano).

• Prezo de venda ao público (PVP) sen e con impostos incluídos coas siglas PVP IVE.

• Símbolos, siglas e lendas segundo o caso .

• Cupón-precinto para o reembolso polo Sistema Nacional de Saúde cando proceda.

Nesta unidade aprendes a información que aparece na embalaxe exterior. Podes aplicar moitas das cousas aprendidas en unidades anteriores, sobre todo respecto ás siglas, símbolos e lendas. Repasa os seguintes conceptos: Excipiente, embalaxe exterior, principio activo, código nacional, cupón-precinto, DOE, DCI e dose. Comproba en medicamentos os datos que aparecen na embalaxe exterior fixándote, sobre todo, na forma farmacéutica, as condicións de uso, as siglas e os símbolos facendo unha correcta interpretación.