Os disfraces son de moitos tipos diferentes e de moitos e distintos materiais. Pódese afirmar que a xente se viste con moita creatividade e picardía, tratando de ironizar ou ridiculizar persoas, situacións ou institucións, poñéndoas do revés e esaxerándoas.

Na zona do Hío, antes da Guerra Civil (1936-39), era moi corrente disfrazarse de mariñeiro, utilizando uniformes de cor branca da época do servicio militar, procedentes da Mariña de Guerra, que os mariñeiros, ó licenciarse traían para os seus domicilios. Estes uniformes completábanse cun faixín atravesando o peito e cos cores da bandeira española, utilizábanos todos os mozos da parroquia. No disfrace feminino abundaban os vestidos de volantes.

A maioría dos traxes e disfraces son producto da confección dunha familiar mañosa e apañada, que recollendo restos doutras confeccións máis serias ou de prendas usadas, consigue simpáticas creacións que espertan a admiración ou a risa nos desfiles. É pouco corrente a presencia de disfraces de confección industrial, aínda que tamén pode darse o caso.

A presencia do disfrace é máis abundante o luns e o martes de carnaval, mentres que o domingo diminúe. Poderiamos dicir tamén que o domingo se disfrazan máis nenos e nenas.

No Hío cada persoa ten liberdade para disfrazarse do que lle apeteza, non existen disfraces  impostos por comparsas, pero moitas veces fanse grupos de amigos e amigas que elixen a utilización dun disfrace colectivo que favorece as escenificacións.