O luns 18 de xuño tivemos a sorte de contar coa visita de cinco poetas recoñecidos entre as nosas letras, un narrador e un editor especialista en poesía. Agasalláronnos co seu bo quefacer literario e as súas ideas particulares sobre o que é ou non a poesía. Ademais, cunha espectadora de excepción: Chus Pato. II Mesa de poetas

O venres 15 de xuño visitou o noso centro este persoeiro para intercambiar impresións co alumnado de 3º ESO C sobre a súa escrita e a literatura galega. Esta visita débese á feliz circunstancia de que a súa filla impartiu aulas ao longo deste curso no noso instituto.

O luns 21 de maio visitounos a escritora lucense María Reimóndez, autora do libro "Usha" no que describe a estancia unha nena, membro dunha ONG, nunha vila da India.
A charla, dirixida ao alumnado de 1º ESO que leran o libro na 1ª avaliación, resultou moi interesante e espertou grande interese entre os rapaces e rapazas, curiosos de coñecer anécdotas e costumes da vida na India. Un dos momentos máis fermosos foi cando a autora se puxo o Sari, prenda típica do pobo hindú.

O mércores 2 de maio achegouse ao centro Antón Caeiro, para presentar a exposición "A Illa da Memoria" que estivo no centro desde o 2 ao 8 de Maio. Explicounos dun xeito moi ameno como xurdiu e por que esta exposición, contándonos anécdotas do entrañable que resultou para el coñecer aos protagonistas de moitas das historias dos paneis, así como o labor documental de facer encadrar as pezas, que -ironicamente- neste caso son humanas. Antes de rematar invitou a unha veciña de Silleda, Cachita, a contar en primeira persoa as súas vivencias desta época, posto que ela era filla dun dos presos na Illa. Resultou moi conmovedor.

O luns 26 de marzo achegouse ao centro Domingo Villar, escritor chegado de Madrid, e quen se dirixía por primeira vez a un público adolescente. Autor de "Ollos de auga", novela policiaca protagonizada por Leo Caldas, traducida con gran éxito ao castelán e agora a outros moitos idiomas, falounos dos seus anceios pola escritura, da historia da súa vida profesional e dos seus proxectos para o futuro, entre os que se atopa a continuación das peripecias deste inspector de policía que vai camiño de se converter nun clásico do xénero negro en galego.

O xoves 15 de febreiro, o ensinante e investigador lalinense Manuel Igrexas Rodríguez impartiu a conferencia “A represión no Deza”. Esta actividade enmarcouse dentros dos diferentes actos que tiveron lugar no noso centro co gallo da exposición "Os mártires do mar" que tivemos o pracer de acoller entre o 12 e o 23 de febreiro. O evento estivo dirixido ao alumnado de 4º ESO e 1º Bacharelato.

O martes 12 de decembro visitounos Isidro Novo autor da obra Un escuro rumor tralo silencio, novela lida polo alumnado de 1º de Bacharelato. Esta visita debémoslla á Editorial Sotelo Blanco.
A reunión resultou ser moi amena e entretida, posto que tanto Isidro como o noso alumnado falaron durante máis de hora e media sobre un mundo posíbel que Isidro imaxina nun futuro non moi afastado, xa que o libro encádrase dentro do xénero da literatura fantástica.

O martes 14 de novembro visitounos Luz Darriba, licenciada en Belas Artes, que traballa en diferentes proxectos de macroinstalacións dentro e fóra de España e que colabora con distintas publicacións de xénero. Veu ao noso centro a nos explicar o Proxecto PALABRAS +, proxecto que retoma o problema da inequidade simbólica de xénero como compoñente esencial da violencia física e social contra as mulleres. PALABRAS + ten como obxectivo construír palabras, definicións, significados novos aos xa existentes coa finalidade de aportar un novo sentido concreto e simbólico á realidade.