A mediados do século III antes da nosa era, o imperio de Alexandre Magno desmembrouse e Exipto pasa a ser gobernado por un dos seus xenerais, Ptolomeo I, quen funda a Biblioteca de Alexandría. O seu fillo Ptolomeo II continuou coa consolidación da grande biblioteca.

Naqueles días a Alexandría chegaban barcos con mercadorías de todo o Mediterráneo, e entre elas cestos enormes ateigados de rolos de papiro (os libros daquela época) con volumes de todo tipo: obras de teatro, poemas épicos, tratados de filosofía, medicina, matemáticas, retórica... Tratábase de recompilar todo o coñecemento para constituír a maior e mellor biblioteca do mundo.

Pero ao cabo dun tempo os funcionarios do novo edificio víronse desbordados pola enorme cantidade de rolos que contiña, e axiña llo fixeron saber ao rei.

Daquela Prolomeo II mandou chamar a Zenodoto e encargoulle a organización da Biblioteca.

Zenodoto visitou o grandioso edificio da Biblioteca e decatouse do problema ao ver a centos de traballadores carrexando miles de cestas cheas de rolos de papiro dun lugar a outro, distribuíndoas segundo podían polas inmensas salas daquela obra xigantesca. Había centos de milleiros de rolos de papiro, se cadra máis dun millón. Ninguén sabía como ordenar aquilo, e ordenalo era a clave, pois unha biblioteca non valía nada polo mero feito de amorear miles de rolos se ninguén era quen de atopar un cando alguén quixera consultalo.

Zenodoto marchou para a súa casa pensando no traballo imposíbel que se lle encargara, e non durmiu en toda a noite ata que tivo un intre de iluminación.

Á mañá seguinte Zenodoto acudiu de novo á Biblioteca e subiuse a unha mesa en medio de todos aqueles rolos, e falou alto e claro aos traballadores da grande Biblioteca de Alexandría:

-Ordenaremos os rolos pola orde alfabética do seu autor!

Todos se miraron asombrados, pero aí estaba a chave. Ao cabo duns anos de traballo aquela inmensa biblioteca tivo os seus centenares de miles de rolos arquivados e localizables.

Resumido e traducido do libro de Santiago Posteguillo "La noche en que Frankestein leyó el Quijote"

Reflexiona sobre o que acabas de ler:

• Que diferencia hai entre un almacén de libros e unha Biblioteca?
• Que finalidade ten a clasificación nunha Biblioteca?
• Quen fixo a primeira clasificación?
• Pensa en usos actuais da ordenación alfabética.

Reflexiona sobre esta definición:

• Cal é a finalidade da CDU?
• En que sistema de clasificación se basea a CDU?
• A CDU é un sistema estático ou está en constante revisión?
• Que elementos serven de base para a ordenación?