Aula de AL

O colexio tamén conta con esta aula destinada á rehabilitación de nenos con problemas dentro da área da linguaxe, tanto en lingua castelá como en lingua galega, abarcando os aspectos oral e escrito.

Dentro da problemática que presentan os nenos que acoden a esta aula, atópanse os trastornos articulatorios ( dislalias), problemas de comunicación oral e atraso lectoescritor de diversa etioloxía.

O obxectivo  principal será, en primeiro lugar, a rehabilitación da linguaxe oral, seguido da rehabilitación de tódolos aspectos relacionados coa lingua, tendo en conta as características individuais de cada alumno (físicas, psíquicas e sensoriais) e considerando o entorno familiar e social no que se desenvolve o neno.

As actividades máis importantes da aula son:

-- Os exercicios logopédicos de adestramento fonético: relaxación , sopro, articulación, repetición e vocabulario.

-- As actividades para a reestructuración da linguaxe: formación de frases e construcción do pensamento lóxico a través da lectura e escritura de textos, xogos didácticos, realización de fichas adecuadas ás necesidades do neno ou nena, ...

-- A aplicación de programas informáticos para a rehabilitación da linguaxe oral e da aprendizaxe lecto-escritora.

-- O teatro.

De tódalas actividades desenvolvidas, os programas informáticos e as representacións teatrais son as que presentan unha mellor acollida por parte dos alumnos.

O teatro supón unha ferramenta de gran importancia para potenciar as habilidades expresivas e de comunicación, ademais da satisfación proporcionada pola obtención de dous accesits no concurso "Entre nós, en Galego", organizado pola Dirección Xeral de Normalización Lingüística da Consellería de Educación da Xunta de Galicia.