O SEGREL DO PENEDO
O SEGREL DO PENEDO
A biblioteca do
noso instituto, Biblioteca “O Segrel do Penedo” toma o seu nome do último segrel
de Galicia, Xosémaría Pérez Parallé, o poeta do Penedo de Barallobre. Home que
dedicou toda a súa vida ao ensino, a Galicia e á poesía e a quen queríamos
render unha cariñosa e merecida homenaxe.
A nosa biblioteca
vén funcionando dende hai bastantes anos a pesar da falta de recursos e persoal
especializado, pero gracias á boa vontade dun grupo de profesores e profesoras
ao fronte do cal sempre houbo un coordinador ou coordinadora que con poucos
coñecementos e moitas ganas de traballar e organizar o que ao principio era un
“almacén de libros” lograron, ao cabo destes anos, crear unha verdadeira
biblioteca escolar. Pero é a partir do ano 2005, cando entramos a formar parte
do Plan de Mellora de Bibliotecas Escolares de Galicia (PLAMBE), cando o noso
proxecto da biblioteca “O Pazo da Fantasía” foi unha realidade grazas, entre
outros, á constitución dun grupo de profesorado estable que se dedica á súa
organización, xestión e dinamización, ofertando un espacio educativo ao servicio
da nosa comunidade educativa.
Nestes
dous últimos anos o noso máximo interese céntrase na idea de converter a nosa
biblioteca escolar nun verdadeiro centro de recursos da información, a lectura e
a aprendizaxe na que o alumnado, o profesorado e todos os membros da nosa
comunidade escolar sexan os seus protagonistas principais. Deste xeito, a
dinamización da nosa biblioteca é un dos nosos obxectivos prioritarios,
entendendo por dinamización o tratamento de tres grandes eidos como son a
formación de usuarios, a alfabetización informacional e a animación lectora.
Os
obxectivos da formación de usuarios son crear lectores autosuficientes na
biblioteca o que implica dominio do espacio e coñecemento dos servicios, así
como dar a coñecer o fondo e as técnicas para acceder á información. Este curso,
e debido ás obras que se estiveron realizando, así como o cambio e ampliación no
mobiliario, teremos que levala a cabo durante este último trimestre, para o que
xa temos preparados uns dossiers que
lle facilitará a aprendizaxe ao noso alumnado.
Elaboramos un “Caderno do Explorador” para o alumnado de 1º e 2º de ESO. O
caderno divídese en varios apartados:
-
Os distintos tipos de documentos que se poden atopar nunha biblioteca:
obras de consulta, libros informativos, información periódica e documentos
electrónicos.
-
As distintas partes dun libro tanto por fóra como por dentro, así como as
dun periódico.
-
A organización dunha biblioteca. A Clasificación Decimal Universal
-
Como atopar un documento nunha biblioteca.O OPAC “Online Public Access
Catalog”
Así mesmo
xa temos case rematado o “Caderno do Navegador”, para o alumnado de 3º e 4º de
ESO. O que pretendemos con este caderno é facilitarlles a busca de información a
traveso da web. As bases de datos, os buscadores, as clases de busca, os
metabuscadores son algúns dos termos cos que deberán familiarizarse.
En canto
ás actividades de dinamización, estas van encamiñadas por un lado a potenciar a
utilización da nosa biblioteca e por outro, a acercar ao alumnado ao libro e a
outros materiais, á lectura e á literatura oral, dun xeito máis lúdico para o
ocio e o tempo libre e que dende a nosa biblioteca desenrólanse ao longo de todo
o curso. Esa oferta de actividades, como podedes comprobar, é moi ampla. Temos
“O libro dos nosos favoritos” á porta da biblioteca, no cortizo da biblio
aparecen “A frase da Semana”, as Suxestións mensuais de lectura e cine, o
boletín coas novidades que se expoñen no recuncho das novidades da biblioteca.
Así mesmo organízanse exposicións con motivo dalgún feito ou dalgunha data
sinalada, este curso organizámos algunhas; polo “Día dos Dereitos dos Nenos”, o
“Día da Paz”, o “Día da Muller”, o “Día da Poesía” e o “Día do Libro” e por se
foran poucas acabamos de montar unha sobre “A historia do Cómic en España e o
Cómic do século XXI”
Estas
exposicións van acompañadas dunha selección de libros, maioritariamente novelas,
escollidas de entre as que temos na biblioteca do centro así como de entre as
novidades do mercado editorial, onde se aborde o asunto central, procurando que
haxa unha oferta suficientemente plural en canto aos enfoques a considerar. Así
mesmo compleméntase con material audiovisual, dende cancións alusivas ao asunto
a tratar, das que se elabora unha relación e se fan sonar algunhas delas dende a
radio escolar durante os recreos, ata proxeccións de imaxes mediante un canón de
vídeo que se dispón estratexicamente e se pon en marcha igualmente durante o
tempo de lecer, e que pretende chamar a atención do alumnado e atraelo a un
medio, o audiovisual, posiblemente máis afín ás súas inquedanzas e aos tempos que corren.
Como
complemento de todo o exposto con anterioridade, tamén se editan dípticos e
trípticos informativos sobre a temática en cuestión, así como guías de lectura,
música e cine; recomendacións ás que poden ter fácil acceso xa que forman parte
dos fondos da nosa biblioteca. Todas estas exposicións acompáñanse de distintas
actividades que son desenvolvidas, principalmente, polos titores e titoras da
ESO durante as horas dedicadas á titoría de aula.
Ademais
neste curso e con motivo do Día das Letras Galegas, elaboramos unha webquest,
sobre María Mariño, a súa obra e a época que lle tocou vivir, destinada ao
alumnado de ESO e que traballa as materias de Lingua Galega e Sociais. E para
celebrar esta data organizamos unha serie de actividades e xogos para o venres
18 de maio. A “Xincana cultural, “Poemas para un Día”, “As caras das Letras”, xogos populares e un taller de Cerámica impartido polo prestixioso ceramista
Francisco Pérez Porto.
Organizáronse varios clubs de lectura entre o alumnado da ESO, onde se trata a
temática da violencia entre iguais e outras culturas e tradicións, e o alumnado
de plástica de 4º está a decorar os exteriores da biblioteca cuns murais sobre
o libro e a lectura onde o protagonista é a nosa mascota.
Así mesmo
o día 23 de abril, Día do Libro, saíu á luz o noso blog
www.osegrel.blogspot.com
Neste espacio dixital, aparecen as actividades da nosa biblioteca,
recomendacións de lectura (pronto música e cine), direccións de páxinas web
interesantes... é unha bitácora ao servizo da comunidade educativa e que
pretende ser un punto de encontro e aprendizaxe no que vos animamos a participar
cos vosos artigos, as vosas suxestións, os vosos comentarios....
Alguén podería estarse a preguntar,
que todo isto para que. Estou convencida de que se ofertamos unha boa
biblioteca, unha biblioteca viva e dinamizada, un bo centro de documentación con
información variada, equilibrada, actualizada e en múltiples soportes veremos
como medra o uso e a necesidade das bibliotecas escolares. Pero non sería xusto
rematar este artigo sen amosar o recoñecemento a todos eses compañeiros e
compañeiras que, traballando ás veces de xeito illado, pola apatía dos claustros
e/ou a incomprensión das direccións, pero sempre recibindo o recoñecemento do
alumnado, seguen a manter a ilusión e as ganas de traballar, por seren todos eles os que manteñen o facho das bibliotecas escolares en
Galicia
Loly Lago
(Coordinadora da Biblioteca)
|