APRENDER SENDO ADULTOS

Somos un grupo de persoas de moi diversas formas de pensar e de diferentes idades (que van dende os dezasete aos setenta e sete anos), pero todos temos algo en común: a inquietude de non quedarnos atrás nas novas tecnoloxías e a actualización dos nosos coñecementos adquiridos hai tempo.

Estamos divididos en dous grupos: a un, interésalle a informática, aprender a andar cos ordenadores para poder comunicarse cos fillos e netos, e o outro, optou por sacar o título da ESO, dado que no seu momento non tivo ocasión de facelo.

A moitos resúltanos difícil volver de novo a poñernos en contacto con libros, aparcados fai bastantes anos, algo que imos superando grazas ao noso esforzo, ao noso tempo e á axuda do profesorado.

Recordando a nosa etapa de estudante dámonos conta do cambio tan grande que deu o ensino; pensamos que dispoñen de moitos medios ao seu alcance, algo do que nós careciamos e que eles non saben valorar.

A nosa experiencia foi moi positiva este ano, animamos á xente coma nós a que participe nestes cursos, pois consideramos que a estas alturas da vida enriquecenos e axudanos a seguir tendo ilusión por mellorar os nosos coñecementos.

Alumnas e alumnos da ESPA