Daniel Bellón, o gaiteiro de Barallobre

Daniel Bellón, fórmase como gaiteiro no seo da Banda de Gaitas “Airiños de Fene” (que participa recentemente no Festival de Lorient,  1999 e 2001) e está en posesión de Numerosos premios como gaiteiro solista entre os que cabe destacar o “Constantino Bellón”, o concurso de gaiteiros solistas máis prestixioso de cantos se celebran  en Galicia, no que se alzou como gañador na última edición. Do mesmo xeito,ben sexa como membro da banda (gaiteiro solista) ou de outras agrupacións, obtivo diversos premios dentro da música tradicional, e actúa en diferentes lugares da xeografía española (Barcelona, País Vasco, Madrid,…). Na actualidade é profesor de gaita e percusión na asociación “Medúlio” de Ferrol.

Marta- De onde es?

Daniel – Son de Barallobre.

- Tocas nalgún grupo de gaita?

D.- Si, teño un grupo que se chama Lúas verdes, todos somos da zona de A Coruña, de Miño, Cecebre, … e tamén hai tempo que toquei na banda “Airiños” de Fene, que é de aquí e tamén ensaian en Barallobre; e en varios grupos que teñen unha longa traxectoria.

- A que anos comezaches a tocar a gaita?

D.- Aos 10 anos.

- Apoioute alguén para ir aprender a tocar a gaita?

D.- Si, os meus pais.

- Quen che comprou a primeira gaita?

D.- A primeira gaita ….foi un pouquiño unha axuda de todos, de meus pais, de meus avós, … foi o típico regalo para poder empezar.

- Participaches nalgún concurso?

D.- Si,  en moitos concursos, tanto de solistas como de grupos.

- A cantos sitios fuches tocar a gaita?

D.- Buff!, pois non che podería dicir exactamente a cantos, mais a moitos, moitos. Non sei, pero en total, ao mellor, foron máis de 100 actuacións entre a banda de gaitas e as outras.

- A algún país?

D. – Si, a Francia, Portugal. En Francia, participei no festival de Lorient, e, en Portugal en varios festivais intercélticos.

- Agora, ao estar estudando, terás dificultades para poder ensaiar?

D.- Ultimamente si; cando estaba en Bacharelato non tanto, mais agora ultimamente si, aínda que tampouco perdo demasiados ensaios.

- Cantas veces ensaias á semana?

D.- Pois procuro ensaiar todos os días un pouco, aínda que sexan só 15 minutos.

- Gravaches algún disco?

D.- Non, agora mesmo estamos niso.

- Cando pensades editalo?

D.- Nestes momentos estamos coa gravación polo que penso que tardaremos aínda un mes en rematar esta primeira fase. Logo, para publicalo levaranos outro mes, e coas historias legais que fan falla para que saia, outro mes. Ao final, contamos que saia en maio.

- Pódesme dicir algunhas cancións que sabes tocar?

D.- Si, vaia, de todo, desde as típicas que tocaban os gaiteiros vellos desde hai 100 anos, muiñeira de Chantada, ata a “jota” de Bergantiños, … moitísimas cancións.

- Cando remates os estudos do ciclo superior de Sistemas de Telecomunicación e Informáticos, vas seguir tocando a gaita?

D.- Si, si, iso espero, espero seguir tocando toda a vida. Non sei o tempo que terei, se terei tanto coma agora mais espero seguir tocando sempre. É unha cousa que me gusta e non resulta ningún impedimento estudar ou traballar.

- Cando vas tocar por aí adiante, como te sentes?

D.- Ben, ao principio, cando era máis pequeño, nas primeiras actuacións estaba un pouco nervoso, pero hoxe en día, a base de ir tocando por aí, xa non me poño tan nervoso. Hai veces que si, depende se hai moita xente, ou de outras circunstancias. Normalmente non acostumo a poñerme nervoso.

- Gustaríache ser profesor de gaita?

D.- Xa son profesor de gaita, a día de hoxe, na escola de Medulio, en Ferrol. Dende hai catro meses dou clases de gaita aos rapaces e tamén a persoas maiores.

- Como te sentes dando clases aos nenos?

D.- Pois … a verdade é que me gusta, porque é revivir un pouco a maneira que tiven eu de aprender. Ademais, aprender aos rapaces sempre dá alegrías.

Marta Permuy Feliú (alumna de ESPA)

Non sexa tonto e inserte aquí a súa publicidade como fan os demais