IES do Castro de Vigo

Na semana do 1 ao 5 de febreiro celebrouse, no IES do Castro, a primeira competición internacional do programa Erasmus+ (Dispute, Discuss, Develop) que ten como obxectivo incorporar o formato de debate do filósofo Karl Popper na ensinanaza das escolas participantes. 

Os outros tres centros implicados son a Szabad Walford Atalanos Iskola és Gimnazium, de Szeged (Hungría), a 5th General Lyceum of Nea Ionea, en Atenas (Grecia), e a Bauska Valsts Gimnazja, da cidade de Bauska, no sur de Letonia.

Na primeira parte da competición, organizada en dúas fases semifinais e unha final, os equipos, por países, debatiron sobre si o mundo sería mellor sen o cultivo e consumo de alimentos modificados xenéticamente. Un dos equipos tivo que argumentar a favor desa tese e os argumentos do equipo contrario ían dirixidos a refutala. O primeiro día, o luns 1 de febreiro, o equipo de Vigo enfrontouse ao de Letonia e quedou vencedor. Pola tarde, o equipo de Grecia enfrontouse ao de Hungría e foi o primeiro o gañador. O martes  celebrouse a final entre os equipos de Vigo e Grecia e este último resultou gañador. 

 O xoves, 4 de febreiro, comezou a segunda parte desta competición tamén organizada en dúas fases semifinais e na que os alumnos, en grupos mixtos internacionais (cada grupo cun alumno/a de cada país), debatiron sobre os beneficios das dietas vexetarianas. 

Ademais das competicións, os estudantes viaxaron a Santiago de Compostela e visitaron as instalacións do porto de Vigo. 

Os resultados deste encontro foron tremendamente satisfactorios e os estudantes demostraron un nivel moi alto tanto no que se refire á organización da argumentación coma á expresión e comprensión da lingua inglesa. A actuación dos equipos foi avaliada mediante un protocolo de avaliación e o xurado, en todos os casos, alabou o correctísimo seguimento das normas do debate e que os estudantes son quen de rebatir a argumentación contraria, o que significa un grande nivel de atención ao que di o contrario e excelente comprensión da lingua inglesa.

Clique nás imaxes para velas a tamaño 1:1

 Reseña do evento na prensa (Atlántico diario de Vigo)

http://www.atlantico.net/articulo/vigo/castro-acoge-debate-alumnos-paises/20160203095950512268.html

O IES do Castro está a desenvolver o programa europeo Erasmus+k2 DISPUTE, DISCUSS, DEVELOP xunto con outros tres centros de distintos países: a Szabad Walford Atalanos Iskola és Gimnazium, que é o centro coordinador internacional e sitúase en Hungría, na cidade de Szeged, a 5th General Lyceum of Nea Ionea, en Atenas (Grecia), e a Bauska Valsts Gimnazja, da cidade de Bauska, no sur de Letonia.

Este programa europeo céntrase en utilizar o DEBATE como ferramenta pedagóxica para mellorar a competencia comunicativa do alumnado no que respecta á expresión oral e ás técnicas de argumentación. Para conseguilo, partimos do formato de debate ideado polo filósofo Karl Popper, que lles permite aos estudantes desenvolver habilidades orais e competencia comunicativa, xerar procesos de pensamento crítico, lectura comprensiva da documentación aportada para a preparación do debate, selección da información e desenvolvemento de técnicas argumentativas.

A lingua de traballo é o inglés e os estudantes terán que utilizar esta lingua nos debates en grupos transnacionais e nos debates no sitio web, pero tamén utilizarán as linguas oficias da comunidade nos debates de preparación, sobre distintas materias do currículo.

O programa contempla catro competicións internacionais: a primeira, en febreiro de 2016, en Vigo; segunda, en abril do mesmo ano en Letonia; a comezos do próximo curso terá lugar a terceira reunión, en Atenas (Grecia) e, a última, en abril de 2017, en Hungría. En cada competición, que conta con dúas fases semifinais e dúas finais, participarán, como oradores, cinco estudantes por país e centro escolar.

A lingua utilizada en todas as actividades deste proxecto é o inglés e todas as actividades dos encontros, competicións, así como a viaxe dos estudantes e profesorado estranxeiro están subvencionadas polos programas ERASMUS+ da Unión Europea.