IES do Castro de Vigo

BENVIDA DE SETEMBRO 

Aconsellamos visitar a nosa páxina web estes días, antes do comezo de curso, onde iremos publicando toda a información sobre o inicio e as normas e medidas que vaian saíndo. 

Alumnado 2º, 3º e 4º ESO

Benvidas e benvidos de novo a este curso. Temos moitas ganas de volver a vervos e estar nas aulas de forma presencial outra vez. Gustaríanos que as circunstancias fosen diferentes pero esperamos que nestes tempos difíciles que nos está a tocar vivir colaboremos alumnado e profesorado para que vaia todo o mellor posible. 

Temos preparado o centro con todas as medidas de seguridade para minimizar os posibles contaxios pero necesitamos que cumpramos rigorosamente as normas de seguridade. Sabedes que tedes que traer posta a máscara en todo momento (é necesario ter máscaras de reposto na mochila, xel hidroalcólico e panos desbotables) e seguir os percorridos marcados no centro, que xa vos explicaremos, para manter as distancias de seguridade o máximo posible. 

O primeiro día estarán os titores esperándovos e explicaranvos os percorridos, as novas medidas de seguridade, os novos horarios, aulas, recreos etc. Un caderno e un bolígrafo tamén vos farán falta para algunhas anotacións. Lembrade que, de momento, non poderedes compartir material nin libros de texto.

Se tedes calquera dúbida poderedes preguntarlle ao profesorado, titores/as , os membros do Equipo Directivo ou de orientación. 

Comeza a conta atrás para vernos e xa vos estamos esperando con moita ilusión!

A xunta directiva do IES do Castro

BENVIDA DE SETEMBRO

Aconsellamos visitar a nosa páxina web estes días, antes do comezo de curso, onde iremos publicando toda a información sobre o inicio e as normas e medidas que vaian saíndo. 

1º ESO Alumnado novo 

Benvidos a todo o novo alumnado. Queremos darvos a benvida ao noso centro. Gustaríanos que as cousas fosen doutro xeito, noutra situación, pero, aínda que nos toca vivir estes tempos complicados, intentaremos pór todos os medios para recibirvos o mellor posible.

Queremos que vos sintades acollidos e esperamos que teñades un bo curso no noso instituto, que axiña será o voso tamén. Temos preparadas todas as medidas de seguridade (lembrade que sempre teredes que estar con máscara) e xa vos explicaremos dende o primeiro día como tedes que entrar, movervos e saír do centro para vir a clase con garantías. Depende de todas e todos nós que poidamos estar no centro con tranquilidade.

Todos os días de clase deberedes traer máscara posta e outras de reposto nunha bolsiña na mochila, un xel hidroalcólico e panos desbotables (aínda que tamén teremos nas aulas para uso de todas e todos). Podedes traer merenda para o recreo. 

O primeiro día recibirémosvos os membros do equipo directivo e os/as vosos/as titores/as e, ao longo da semana , iredes coñecendo ao resto do profesorado. Xa estaremos esperándovos na porta A , a do Mural botánico, para ensinarvos o camiño que deberedes facer todos os días ata chegar ás aulas. Un caderno e un bolígrafo tamén vos farán falta para anotacións, copiar horario etc. 

Benvidos e benvidas ao IES do Castro . Esperamos que pasemos un bo curso e que todo o alumnado e profesorado colaboremos conxuntamente. Se tedes calquera dúbida podedes comentala na clase cos vosos profesres/as, titores/as ou Equipo Directivo.

Comeza a conta atrás para vernos e coñecernos! Esperámosvos con moita ilusión!

A xunta directiva do IES do Castro