Formación medioambiental e voluntariado en ‘As Corcerizas’
Durante os pasados días 15 a 18 de novembro o grupo 1º E de Bacharelato, do BI, realizou unha viaxe de estudos centrada na programación de CAS, aínda que moitas das actividades realizadas teñen unha función integradora de diversas materias e requerimentos do BI.
A viaxe consistiu nunha estancia no Centro Medioambiental ‘As Corcerizas’ (http://www.amigosdaterra.net/info/ascorcerizas/index.html) xestionado por Amigos da Terra. Nas fotos podemos ver ao grupo de alumnado durante a realización dalgunha das actividades, co profesorado acompañante e monitores e monitoras encargadas das actividades.
Aínda non estando completa a avaliación da actividade –enfocada a buscar solucións a problemas globais, dende unha perspectiva local- por parte do alumnado, podemos adiantar algunhas das experiencias vividas e habilidades traballadas.
Entre outros contidos traballáronse os seguintes:
-finalidade do voluntariado na sociedade. Servizo de Voluntariado Europeo
-problemática medioambiental local e global
-elaboración dun proxecto de voluntariado e presentación pública do mesmo
-realización de actividades de voluntariado etnográfico e medioambiental
Todo elo mantendo presente a promoción ou práctica de:
-técnicas de traballo en grupo para os distintos obxetivos
-debates e outras estratexias de comunicación
-capacidade crítica
-conciencia medioambiental
-responsabilidade persoal e colectiva
-conservación do patrimonio
-atención ao benestar físico e psíquico
-reflexión sobre a aprendizaxe persoal
Esta promoción tiña baixas expectativas de aprendizaxe da súa visita a As Corcerizas e isto reflexouse na súa actitude durante unha boa parte das actividades e por suposto, dificultou a súa aprendizaxe. Na súa avaliación final varias persoas sinalan que se volvesen facer esta actividade outra vez intentarían ser máis participativas e abertas. De calquera xeito sinalan que
-se cumpliron os obxetivos de coñecer mellor ao resto do grupo, respetar máis o medioambiente e comprender CAS mellor.
-comprenderon unha variedade de posibilidades para unha mellor xestión da enerxía
-consideran que o voluntariado é unha ferramenta eficaz para transformar o modelo actual cara un máis xusto. De feito a 4 persoas gustaríalles facer traballo de voluntariado de xeito local , e 3 mencionan a posibilidade de facer o Servizo de Voluntariado Europeo antes de ir a universidade.
Isto é o que valoraron máis positivamente da actividade
-convivir cos compaňeiros e compañeiras
-o papel que a desenvolver nela
-que pese a estar moi pouco convencidos/motivados, o pasaron ben
-descubrir cousas para axudar ‚‘aínda que sexa localmente‘
-a actitude e aportacións dos monitores
-o descubrimento dos diferentes frentes de actuación do voluntariado e o traballo físico
Imprimir este Artigo
Imprimir este Artigo
II Concurso de Felicitacións de Nadal
CONCURSO de Felicitacións Nadal 2011
MODALIDADES:
A) FELICITACIÓNS INFORMATIZADAS (en powerpoint, flash, …).
B) FELICITACIÓNS TRADICIONAIS (formato papel).
CATEGORÍAS:
I.- 1º, 2º e 3º da ESO
II.- 4º da ESO, 1º e 2º BACHARELATO
PREMIOS:
50 € en metálico por modalidade e categoría, segundo defina o Xurado
BASES:
1. Poderanse presentar traballos individual e/ou colectivamente.
2. Deberán ser traballos orixinais, e en galego.
3. Nalgún lugar deberá aparecer o nome e/ou logotipo do “IES O Castro de Vigo”.
4. As felicitacións tradicionais faranse nun formato non superior a DIN A4 (210×297 mm.)
5. O xurado poderá declarar deserto calquera premio se estima que non se acada un nivel mínimo de calidade ou orixinalidade.
6. Os traballos presentados serán expostos nas instalacións do centro e na web do instituto.
7. O prazo de presentación dos traballos rematará o 19 de decembro, e o fallo do xurado farase público o día 21 dese mes.
8. Os traballos non regrados na programación académica do Centro serán entregados no buzón da ANPA (modalidade B ou disco en modalidade A) e no correo electrónico anpaiesocastro@hotmail.com (so modalidade A), indicando os seguintes datos: nome(s) e apelidos, e curso.
9. O xurado é composto por 2 membros da ANPA, 2 alumnos da Xunta de Delegados do centro, e 2 profesores do Instituto que serán os que decidirán os traballos premiados.
Imprimir este Artigo
Imprimir este Artigo
O alumnado de 3º celebra o ano internacional dos bosques
Iniciando a xeira con sorpresas: as píntegas no chan, os eucaliptos ameazantes
O pasado xoves 10 de novembro, coincidindo coa semana do San Martiño, e antes de que remate o presente ano, por ser este “O ano internacional dos bosques”, un amplo grupo de profesores e todo o alumnado de 3º da ESO do Instituto en colaboración coa COMUNIDADE DE MONTES VECIÑAIS EN MAN COMÚN DE SAN SALVADOR DE CORUXO trasladámonos ata ese monte para transmitirlles ás novas xeracións a importancia que ten a conservación do monte, para nós non tanto polo valor material, senón máis ben polo valor inmaterial.
A xornada estivo precedida da documentación necesaria para que ademais da información que lles facilitarían alí os gardas forestais xa soubesen minimamente do que se trataba. A andaina partiu sobre as 11 da mañá desde o lugar da ASOCIACIÓN, despois que aquí lles presentaron os gardas algunhas consideracións previas e visen o funcionamento da máquina empregada para a trituración da biomasa, para dirixirse pola aba sur do monte en dirección ao parque forestal de San Miguel de Oia, observar algunha zona de moita vexetación alóctona (eucalipto e acacia negra) e outras de frondosas que están sendo reintroducidas.
Caras coñecidas no camiño: aproveitando o patrimomio inmaterial
Ao mesmo tempo puideron desfrutar de extraordinarias vistas sobre a Ría e de identificación de distintas especies arbóreas (castiñeiro, carballo, freixo, érbedo, capudre, etc), así como outras curiosidades relacionadas co aproveitamento do monte para o lecer (arte rupestre, actividades deportivas que se poden desenvolver, paisaxismo, etc).
Sobre o mediodía chegamos ao punto máis elevado do percorrido, o monte Maúxo (453 m), e aquí puideron observar a paisaxe outonal coa follaxe en distintas tonalidades, os cogomelos recén saídos da terra, e unha mámoa ben localizada no lugar coñecido como a Chan grande (relacionar este topónimo co de Chan da lagoa, Chan da arquiña, etc), e para concluír a mañá subir ata o cumio máis alto e desde alí dominar toda a contorna da cidade en todas as direccións ou mesmo chegar a albiscar ata a ría da Arousa.
Despois de repoñer forzas no parque forestal de Coruxo, descansando e comendo, aínda que a choiva ameazaba a xeira, iniciamos o descenso do monte pola cara leste en dirección a un dos lugares mellor recuperados e conservados do monte: A regueira de Laxiade. Aquí aproveitamos para recordarlles aos alumnos que se trata dun espazo con frondosas (abelairas, amieiros, carballos, castiñeiros, etc.), algunhas das cales recuperaron a zona de xeito espontáneo e outras foron plantadas para evitar a substitución total pola acacia negra e o eucalipto.
Como anécdota, contar que se aproveitou o lugar para aclarar a diferenza entre o bugallo/carrabouxo e a landra dos carballos e para observar algunhas pegadas de píntegas ou xabaríns.
Xa para rematar o percorrido, achegámonos a un dos lugares máis emblemáticos desde o punto de vista artístico, “O petroglifo da Pedramoura”, onde quedan as pegadas de tantos anos atrás, aínda que o seu estado de conservación sexa crítico.
A xornada remata co regreso ao Instituto, logo de recordarlles que aquí se conservan, entre outras, algunha mostra arquitectónica moi importante como é a igrexa de arte románica de San Salvador de Coruxo, e de arquitectura popular: cruceiros, muíños, pombais ou hórreos que poñen de manifesto a importancia que tivo a agricultura na parroquia.
María e Amaia saborean os amorotes dos érbedos
Imprimir este Artigo
Impreso do Reading Report para a ESO
Antes de descargar unha ou outra versión segue as instrucións do teu profesor/a sobre que formato tes que utilizar para realizar a tarefa de Reading Report
DESCARGA
VERSIÓN PARA IMPRIMIR EN PAPEL
VERSIÓN PARA ENCHER NO ORDENADOR EN MODO FORMULARIO E ENVIAR DESPOIS POLO MEDIO QUE O PROFESORADO INDIQUE
reading_report_eso_formulario.pdf
Imprimir este Artigo
MAGOSTO
Co asesoramento do Windguru, o alumnado de 1º e 2º da ESO celebrou o Magosto no Parque Forestal de Beade. O mestre castañeiro deulles matematicamente o punto exacto ás brasas, e entre xogos e natureza… “os que tiveron mañas comeron castañas”
Imprimir este Artigo
Imprimir este Artigo